Жақында Қосшы қаласы бес жылдығын дүркіретіп атап өтті. Бес жыл – тарих үшін қас-қағым сәт болғанымен, адам тағдыры үшін тұтас бір кезең. Осы уақыт аралығында қала мәртебесін алған елді мекеннің ажары кіріп, жаңа үйлер бой көтеріп, халық саны артты. Ресми есептерде – өсім, жоспарларда – серпін, баяндамаларда – болашаққа сенім бар.
Бірақ сол мінберлерден айтылған сөздердің ар жағында басқа бір үн бар. Ол – қағазға түспейтін, есепке кірмейтін, бірақ қоғамның тамырын ұстап тұрған шынайы үн. Ол – сеніміне селкеу түскен, тағдыры тығырыққа тірелген халықтың үні. Сол үннің ең ащысы – «Diamond Park» тұрғын үй кешенінің айналасынан естіледі.
Бұл жоба 2015 жылы басталған еді. Сол кезде талай отбасы болашақ баспанасының кілтін қолына ұстайтын күнді елестетіп, жиған-тергенін, үмітін осы құрылысқа салды. Тапсырыс беруші әрі бас мердігер «An Capital» ЖШС болатын. Алайда 2021 жылы компания құрылтайшысының сотталуы бәрін тоқтатты. Құрылыс та, үміт те.
Сол сәттен бастап 141 азаматтың тағдыры өзгерді. Олар бір сәтте үлескер емес, алдау мен аңсаудың арасында қалған адамдарға айналды.
Уақыт өте олар өз құқықтарын қорғау үшін «Amanat» тұрғын үй-құрылыс кооперативін құрды. Бұл – жай ұйым емес, бұл – шарасыздықтан туған үміттің соңғы шырағы еді.
Жергілікті атқарушы органдар мәселені шешу бағытында жұмыс жүргізіп жатқанын айтады. Шынында да, әрекет бар. Бірақ нәтиже қайда?
2025 жылы «Galamat» ЖШС-мен келісім жасалды. Алайда қаржының жоқтығынан құрылыс басталмай қалды. 2026 жылдың 2 шілдесінде тағы бір келісім – бұл жолы «Integra Construction» ЖШС-мен. Тағы да үміт. Тағы да күтім.
Қазір нысанда техникалық тексеру жүргізілген. Оның қорытындысы тамыз айында жарияланбақ. Сол қорытындыға сүйеніп, жобаны аяқтаудың «алгоритмі» анықталады делінеді. Әкімдік үлескерлермен кездесіп, түсіндіру жұмыстарын жүргізіп жатыр. Ресми тілмен айтқанда – мәселе бақылауда.
Ал бейресми шындық қандай?
Бұл – бес жыл бойы пәтер емес, уәдені күтіп жүрген адамдардың тағдыры. Бұл – балаларын уақытша пәтерден пәтерге көшіріп, «өз үйіміз болады» деген сөзді жұбаныш етіп жүрген ата-аналар. Бұл – банктен несие алып, екі жақты қысымға түскен отбасылар. Бұл – қағаз жүзіндегі «алгоритмдерге» емес, нақты шешімге зәру тағдырлар.
Қосшының бес жылдығы – тек мереке емес, есеп беретін сәт. Осы бес жылда қала қанша үй салды, қанша көше жөнделді – бұл маңызды. Бірақ одан да маңыздысы – сол үйлердің бәріне халықтың сенімі жетті ме?
«Diamond Park» – бір ғана нысан емес. Бұл – жүйедегі жауапкершіліктің, бақылаудың, әділеттің айнасы. Егер осы бір мәселе жылдар бойы шешілмесе, онда басқа жобаларға халық қалай сенеді?
Мемлекет пен халық арасындағы ең нәзік көпір – сенім.
Ал сенімге селкеу түссе, оны қалпына келтіру ең қиын құрылысқа айналады.
Бүгін Қосшы өсіп келеді. Бірақ сол өсімнің ішінде адамдардың жанайқайы естілмей қалмауы керек. Өйткені қала – тек ғимараттардан тұрмайды. Қала – адамдардан тұрады.
Ал сол адамдарды бүгін бір ғана сұрақ мазалайды – біз тағы қанша уақыт күтуіміз керек? Бірақ бұл сұрақтың жауабы жоқ. Әзірге жоқ.
Посмотреть эту публикацию в Instagram
