Ақмола облысында болған бұл оқиға отбасы ішіндегі сенім мәселесінің өзектілігін тағы бір мәрте айқындады. Зеренді ауданында жергілікті тұрғынның атына оның хабарынсыз төрт бірдей несие рәсімделіп, келтірілген шығын көлемі шамамен 2 миллион теңгені құраған.
Тергеу барысында белгілі болғандай, заңсыз әрекетке жәбірленушінің өгей ұлы барған. Ол өгей әкесінің ұялы телефоны мен жеке деректеріне еркін қол жеткізіп, банктің мобильді қосымшасы арқылы бірнеше несие рәсімдеген.
Аталған дерек бойынша қылмыстық іс қозғалып, тиісті жедел-іздестіру шаралары жүргізілді. Нәтижесінде күдіктінің жеке басы анықталды. Қазіргі таңда іс бойынша сотқа дейінгі тергеу амалдары жалғасуда.
Тараптардың өзара татуласқанына қарамастан, құқық қорғау органдары азаматтарды жеке деректердің қауіпсіздігіне бейжай қарамауға шақырады. Мамандардың айтуынша, цифрлық заманда жеке ақпаратты қорғау – әр азаматтың жауапкершілігі. Тіпті жақын адамдардың өзі сенімді теріс пайдалануы мүмкін екені өмір көрсетіп отыр.
