Ұлт тарихында есімі уақыт өткен сайын биіктей түсетін тұлғалар болады. Ахмет Байтұрсынұлы – сондай ұлы есімдердің бірі.
5 қыркүйек – Ұлт ұстазының туған күні. Бұл күннің Қазақстан халқының тілдері күнімен қатар келуінің өзінде үлкен мән бар. Өйткені Ахмет Байтұрсынұлының бүкіл ғұмыры қазақтың тілі мен сауатын, ұлттық санасы мен мәдениетін көтеруге арналды.
Ахмет Байтұрсынұлы әліппе жазды, қазақ тіл білімінің негізін қалады, әдебиеттануға жол ашты, ұлттық баспасөздің қалыптасуына еңбек сіңірді. Бірақ оның еңбегінің мәнін осы қызметтермен ғана шектеуге болмайды.
Оның басты мұраты – қазақты ояту, білімді ұлт қалыптастыру, елдің өз болмысына деген сенімін күшейту еді.
Ахаң қазақ тілінің ұлт тағдырындағы орнын терең түсінді. Өйткені тіл – тек қарым-қатынас құралы емес. Ол – халықтың тарихи жады, дүниетанымы мен рухани болмысы.
Сондықтан тіл мәселесі бүгін де өзекті.
Қазір қазақ тілінің мемлекеттік мәртебесі бар, оны дамытуға бағытталған жұмыстар жүргізіліп келеді. Алайда тілдің шынайы қуаты оның заңдағы мәртебесімен ғана емес, күнделікті өмірдегі қолданысымен өлшенеді.
Тіл отбасыда сөйлегенде өмір сүреді. Мектепте білімнің тілі болғанда дамиды. Ғылымда, мәдениетте, медиада, технологияда қолданылғанда қуаттанады.
Бүгінгі біздің міндет – қазақ тілін тек сақтап қалу емес, оны заманауи қоғамның толыққанды тіліне айналдыру.
Бұл – бір мекеменің ғана емес, баршамыздың ортақ жауапкершілігіміз.
Ахмет Байтұрсынұлының өмірі бізге ұлтқа қызмет етудің үлгісін көрсетті. Ол тіл туралы айтып қана қойған жоқ – тіл үшін еңбек етті. Білімді насихаттап қана қоймай – оқулық жазды. Елдің оянуын тілемей ғана қойған жоқ – сол жолда өмірін арнады.
Бүгін бізге де сөзден іске көшетін уақыт.
Ахаңның есімін ұлықтау – оның атын атаумен шектелмеуі керек. Оның идеясын жалғастыруымыз қажет.
Тілімізді құрметтеу, ұлттық мәдениетімізді сақтау, жас ұрпаққа сапалы білім мен дұрыс бағыт беру – Ұлт ұстазы алдындағы бүгінгі парызымыз.
5 қыркүйек – күнтізбедегі дата ғана емес. Бұл – әрқайсымызға өзімізге есеп беретін күн.
Біз Ахмет Байтұрсынұлының аманатына қаншалықты адалмыз?
Жауабы сөзбен емес, ісімізбен көрінуі тиіс.
Өйткені Ахаңның аманаты – бір адамның аманаты емес.
Ол – тұтас ұлттың аманаты.
Марат Қойшин,
«Қазақ тілі мен мәдениеті» қоғамдық бірлестігінің төрағасы.
