Ақмола облысында республикалық маңызы бар автомобиль жолдарының үш учаскесінде орташа жөндеу жұмыстары аяқталды. Жалпы ұзындығы 95 шақырымды құрайтын жаңартылған жол учаскелері пайдалануға берілді. Жалпы, биыл өңірде 420 шақырымнан астам автомобиль жолын жөндеу жоспарланып отыр.
Сапалы жол инфрақұрылымы – өңірдің әлеуметтік-экономикалық дамуының маңызды факторларының бірі. Маңызды көлік бағыттары өтетін Ақмола облысы үшін автомобиль жолдарының жағдайы айрықша маңызға ие. Күн сайын бұл жолдармен өңір тұрғындары, жолаушылар және жүк көліктері қатынап, елді мекендер мен еліміздің өңірлері арасындағы байланысты қамтамасыз етеді.
Биыл республикалық маңызы бар автомобиль жолдарын жөндеу жұмыстары бірнеше бағыт бойынша жалғасуда. Әсіресе көлік қозғалысы қарқынды және жоғары жүктемеге ие учаскелерге басымдық берілуде.
Аяқталған нысандардың бірі – республикалық маңызы бар А-16 «Жезқазған – Петропавл» автомобиль жолының 445–490 шақырым аралығы. Бұл учаскеде ұзындығы 45 шақырым жолға орташа жөндеу жүргізілді. Жоба аясында мердігер «Қазақжолы 2050» ЖШС бірқатар кешенді жұмыстар атқарды. Атап айтқанда, темірбетон су өткізгіш құбырлар орнатылып, жолдағы шөгу және ісіну секілді ақаулар жойылды. Жол жабыны 20 сантиметр тереңдікке дейін фрезерленіп, ресайклинг әдісімен қайта өңделді. Жол негізі дайындалғаннан кейін екі қабатты асфальтбетон жабыны төселді. Төменгі қабат қалыңдығы 7 сантиметр болатын ірі түйіршікті асфальтбетоннан, ал жоғарғы қабат қалыңдығы 5 сантиметр болатын ұсақ түйіршікті асфальтбетоннан жасалды. Сонымен қатар жол жиектері нығайтылып, жол таңбалары жаңартылды.
Осылайша, 45 шақырым жолдың бойында қозғалыс қауіпсіздігі мен жайлылығына қойылатын заманауи талаптарға сай келетін жаңа жол жабыны пайда болды.
«Бұл жолды Жарқайың және Жақсы аудандарының жақын орналасқан елді мекендерінің тұрғындары, сондай-ақ басқа өңірлерге қатынайтын жүргізушілер тұрақты пайдаланады. Жөндеуден кейін жолмен жүру әлдеқайда ыңғайлы болды. Жаңартылған учаске ұзақ жылдар бойы қызмет етеді деп сенеміз», – дейді жергілікті тұрғындар.
Орташа жөндеу жұмыстары республикалық маңызы бар М-36 «Ресей Федерациясының шекарасы (Екатеринбург бағыты) – Алматы, Қостанай, Астана, Қарағанды арқылы» автомобиль жолының 917–946 шақырым аралығында да аяқталды.
Жөнделген учаскенің ұзындығы 29 шақырымды құрайды. Мұнда жолдағы шөгу және ісіну секілді ақаулар жойылып, ескі жабын фрезерленді және жаңа екі қабатты асфальтбетон жабыны төселді. Жол жабынының төменгі қабаты қалыңдығы 7 сантиметр болатын ірі түйіршікті асфальтбетоннан, ал жоғарғы қабаты қалыңдығы 5 сантиметр болатын ұсақ түйіршікті асфальтбетоннан орындалды. Сонымен қатар жол жиектері нығайтылып, жол таңбалары салынды.
Бұл учаскенің жаңартылуының маңызы зор. Себебі аталған автожол еліміздің солтүстік және орталық өңірлерін байланыстыратын маңызды көлік дәліздерінің бірі болып саналады.
«Бұл трассамен жиі жүремін. Жолдың жағдайы нашар болған кезде жылдамдықты төмендетіп, шұңқырлар мен ой-шұңқырларды айналып өтуге тура келетін. Қазір жол жабыны тегіс, қозғалыс әлдеқайда ыңғайлы. Жүргізушілер үшін ең бастысы – жолдың қауіпсіздігі мен сапасы», – дейді жүргізуші Амантай Шәкенов.
Зеренді курорттық аймағына қатынау да жеңіл әрі жайлы бола түспек. Ақмола облысында Көкшетау – Зеренді автомобиль жолының орташа жөндеу жұмыстары аяқталды. Орташа жөндеу жұмыстары 21 шақырым жол учаскесін қамтыды. Бұған дейін облыс орталығынан курорттық ауылға дейінгі автомобиль жолының ені небәрі 7 метр болатын. Жөндеу барысында жолдың барлық учаскесінде ресайклинг жұмыстары жүргізілді. Сонымен қатар жол жабынының төменгі және жоғарғы қабаттары төселіп, жол жиектері нығайтылды. Жолдың жаңартылуы өңір тұрғындары мен туристер үшін көлік қатынасын жақсартып, Зеренді курорттық аймағына жетуді анағұрлым ыңғайлы етеді.
Жалпы, аталған үш нысанның пайдалануға берілуі – өңірде жүргізіліп жатқан ауқымды жұмыстардың бір бөлігі ғана.
Биыл Ақмола облысында республикалық маңызы бар автомобиль жолдарының 420 шақырымнан астамын жөндеу жоспарланып отыр. Ақмола облыстық «ҚазАвтоЖол» ҰК» АҚ филиалының басшылығының айтуынша, жөндеу жұмыстары кезінде негізгі назар тек жаңа асфальт төсеуге ғана емес, жол конструкциясының барлық қабаттарының сапасына аударылады.
«Биыл Ақмола облысында жол саласы бойынша ауқымды жұмыстар атқарылуда. Біздің міндетіміз – жол жабынын жай ғана қалпына келтіру емес, жөндеу жұмыстарына кешенді тәсіл қолдану. Нысандарда жол негізіндегі ақауларды жою, ресайклинг жүргізу, жабынның төменгі және жоғарғы қабаттарын төсеу, жол жиектерін нығайту, су өткізгіш құрылыстарды орнату және жол таңбаларын салу жұмыстары атқарылуда. Ең бастысы – жөнделген учаскелердің қауіпсіз әрі ұзақ мерзім қызмет етуін қамтамасыз ету», – деп атап өтті Ақмола облыстық «ҚазАвтоЖол» ҰК» АҚ филиалының директоры Хамзат Сұлтанов.
Оның айтуынша, жұмыстардың сапасына бақылау барлық кезеңде жүзеге асырылады. Әрбір нысан белгіленген талаптарға сәйкес тиісті бақылаудан өтеді. Бұл ретте жобалық шешімдердің сақталуына, жұмыстарды орындау технологиясына және пайдаланылатын материалдардың сапасына ерекше мән беріледі.
Тек кешенді тәсіл қолданылған жағдайда ғана жол жабынының қажетті беріктігі мен ұзақ мерзімді пайдаланылуын қамтамасыз етуге болады. Жолдарды жөндеу жұмыстарының маңызы тек автокөлік жүргізушілері үшін ғана емес. Дамыған көлік инфрақұрылымы кәсіпкерліктің, ауыл шаруашылығының, туризмнің және өңіраралық байланыстың дамуына да оң әсер етеді.
Жалпы ұзындығы 95 шақырым болатын үш жол учаскесінің пайдалануға берілуі – Ақмола облысындағы республикалық маңызы бар жол желісін жаңғырту бағытындағы кезекті маңызды қадам. Жол жөндеу жұмыстары әлі де жалғасуда. Жол-құрылыс маусымы аяқталғанға дейін өңірде 420 шақырымнан астам автомобиль жолын жөндеу жоспарланған.
Бұл жұмыстар көлік қатынасының қолжетімділігін арттырып, жол инфрақұрылымының сапасын жақсартуға мүмкіндік береді. Негізгі мақсат – Ақмола облысының автомобиль жолдарын барлық жол қозғалысына қатысушылар үшін қауіпсіз, сенімді әрі жайлы ету.
