Қоғам деген – сан алуан мінез бен түрлі көзқарастың тоғысқан кеңістігі. Осындай ортада ең қымбат құндылық – өзара түсіністік пен сыйластық. Күнделікті өмірдің өзінде адамдар бір-бірін тыңдап, түсінісе алса, кез келген мәселенің түйіні тарқауы оңайырақ болады.
Бүгінде Ақмола өңірінде қоғамдағы тыныштық пен тұрақтылықтың сақталып отырғаны – осындай қарапайым, бірақ маңызды қағидалардың өмірде өз орнын тапқанын аңғартады. Бұл ретте «Қоғамдық келісім» КММ жанындағы Медиация кеңесінің атқарып отырған жұмысы өз нәтижесін беріп келеді деуге толық негіз бар.
Медиация кеңесінің жұмысы сырт көзге байқала бермегенімен, оның мәні тереңде жатыр. Олар дау туындағанда ғана араласып қоймай, адамдар арасындағы түсіністікті сақтауға, мәселенің алдын алуға баса мән береді. Кейде бір ауыз сөз, бір сәттік сабыр – үлкен келіспеушіліктің алдын алатыны белгілі. Осындай қарапайым қағидаларды қоғамға түсіндіру – кеңес мүшелерінің күнделікті ісі.
Осы орайда этностар арасындағы түсініспеушіліктердің алдын алу мақсатында түсіндіру жұмыстары тұрақты түрде жүргізіліп келеді. Бұл жұмыстар көзге көріне бермегенімен, адамдар арасындағы сенім мен құрметтің сақталуына өз әсерін тигізіп отыр. Соның нәтижесінде қоғамда әркім өз орнын біліп, бір-біріне деген ілтипат жоғалмай, өмір өз арнасымен тыныш ағып жатыр.
Медиация кеңесі мүшелерінің қатысуымен «Қоғамдық келісім» КММ алаңында түрлі форматтағы дөңгелек үстелдер мен мазмұнды кездесулер тұрақты түрде ұйымдастырылып келеді. Мұндай басқосулар өзара пікір алмасуға, ортақ түсіністікті қалыптастыруға мүмкіндік береді. Сонымен қатар, медиаторлар қоғамдық өмірден шет қалмай, түрлі әлеуметтік бастамалар мен іс-шараларға белсенді қатысып, қоғаммен етене байланыста жұмыс істеуде.
Медиация – тек дау шешудің жолы емес, ол – адамдарды жақындастыратын, сөзге тоқтауға, бір-бірін тыңдауға үйрететін мәдениет. Бүгінгі таңда осы мәдениеттің біртіндеп қалыптасып келе жатқаны көңіл қуантады.
Қарапайым тілмен айтқанда, қоғамдағы келісім – үлкен ұрандардан емес, осындай күнделікті түсіністік пен сабырдан құралады. Ал сол түсіністікті сақтауға бағытталған жұмыстардың үздіксіз жүргізілуі – ертеңге деген сенімді арттыра түседі.
Самал Ілясова, Ақмола облысы
«Қоғамдық келісім» КММ жанындағы
Медиация кеңесінің мүшесі.
