Ақмола облысының Зеренді ауданына қарасты Бірлестік ауылында алдағы уақытта жоғары жылдамдықты мобильді интернет қолжетімді болады. Мұнда жаңа антенна-мачталық станция орнату жоспарланып отыр. Бұл — бірнеше жыл бойы цифрлық байланыстың қиындығын көріп келген жергілікті тұрғындар үшін көптен күткен жаңалық.
Бірлестік ауылы Көкшетау қаласынан небәрі 50 шақырым жерде орналасқан. Мұнда 450-ден астам адам тұрады. Қазіргі таңда ауылда тек 3G деңгейіндегі байланыс бар, алайда бұл жылдамдық күнделікті қажеттіліктер үшін жеткіліксіз.
«Бүгінгі таңда адамдармен сөйлесу немесе мемлекеттік қызметтерді алу үшін интернет керек. Енді бұл мәселе шешілетініне қуаныштымыз. Бұл жаңалық ауыл тұрғындарының өмірін айтарлықтай жеңілдетеді», — дейді ауыл тұрғыны Нұртай Мұқышев.
Байланыс сапасы жақсарған соң, балалар онлайн платформаларда сапалы білім ала алады, ал ата-аналар олардың оқуын бақылауға мүмкіндік алады.
Ақмола облысы Цифрландыру басқармасына қарасты Smart Aqmola бөлімінің басшысы Олжас Қами хабарлағандай, жаңа станция құрылысы ауылдың 3G-ден 4G LTE форматына көшуін қамтамасыз етеді.
«Жоба «Қолжетімді интернет» ұлттық жобасы аясында жүзеге асырылып жатыр», — деп түсіндірді ол. — «Біз бұл бастаманы мемлекеттік-жекеменшік әріптестік негізінде іске асырып келеміз. Жалпы, жаңғырту жоспарына шамамен 80 мың тұрғыны бар 102 ауылдық елді мекен енгізілген. Бүгінде облыс бойынша 430 ауыл интернетпен қамтылған, ал ұялы байланыс 98% тұрғынға қолжетімді».
Бірлестіктегі станция құрылысы ауылдық жерлерді цифрландыруға бағытталған жүйелі жұмыстың бір бөлігі болмақ. Жақын айларда ауыл тұрғындары тұрақты әрі жоғары жылдамдықты интернетке қол жеткізетін болады. Бұл білім, кәсіпкерлік пен коммуникация салаларында жаңа мүмкіндіктер ашатыны сөзсіз.
