Целиноград ауданының Қоянды ауылында тағы да өрт. Тағы да — техниканың ақауы. Тағы да — сырттан келген көмектің арқасында ғана басылған тілсіз жау.
20 қараша кешкісін көпбалалы отбасының үйі отқа оранғанда, ауылдағыларға ең алдымен үміт сыйлауы тиіс болған жергілікті өрт сөндіру қызметі тағы да сын көтермеді.
Ақауы бітпейтін өрт машинасы — ауылдың басты «қауіпсіздігі»
Ауыл тұрғындарының айтуынша, Қояндыдағы екі өрт сөндіру техникасының бірі оқиға орнына жетпей, жарты жолда сынды. Яғни, дәл төтенше жағдай кезінде қызмет көрсетуге жарамсыз болып шыққан. Екінші көліктің жағдайы да өзгеше емес — су бүрку жүйесі істемей, бірнеше минут бойы «әуреге» салған.
Ал өрттің әр секунды — адамның тағдыры, бір үйдің болашағы.
Посмотреть эту публикацию в Instagram
Астана техникалары келмесе, не болар еді?
Өртті ауыздықтауға Астанадан қосымша техника тартылды. Екі жедел жәрдем көлігі оқиға орнында кезек күттірмей жұмыс істеді. Бірақ сұрақ ашық күйінде тұр: Егер елордадан көмек дер кезінде жетпегенде не болар еді? Бес баласы бар отбасы аман қалар ма еді? Ауыл тағы бір қайғылы хабарды ести ме еді?
Қояндыда бұл — алғашқы жағдай емес
Оншақты күн бұрын ауылдағы дүкен өртенгенде де жергілікті өрт сөндіру техникасы сыр берді. Сол кезде өрт сөндіру жеңі қатып, өрт сөндірушілер отты тоқтата алмай, сырттан көмек келгенше дүкен отқа оранған болатын.
Әр өрттен кейін бір ақау анықталады. Бірақ шешім жоқ.
Өрт болған сайын бір түйткіл ашылады:
-
біресе машина жүрмейді,
-
біресе су бұрқамай қалады,
-
біресе өрт сөндіру жеңі қатады.
- біресе мүлдем су болмай қалады.
Бұл – кездейсоқтық емес. Бұл — жүйелі мәселе. Қараусыз қалған техника, ұдайы жаңартылмаған жабдық, өрт қауіпсіздігіне салғырт қарау.
Ауыл тұрғындарының талабы — орынды
Қояндыдағы ахуал бір нәрсені анық көрсетті: ауылға толыққанды, дербес жұмыс істейтін өрт сөндіру бекеті қажет.
Өмірді апаттан арашалайтын қызметтің техникасы істен шығып жататын елді мекенді қауіпсіз деп айту — көз жұму.
Түйін:
Қояндыдағы соңғы өрттер — жай оқиға емес, жүйенің қаншалық әлсіз екенін көрсететін айна.
Қауіпсіздік — статистика мен есеп үшін емес, адамдардың өмірі үшін қажет.
Ал зәкірге айналған ескі техникамен төтенше жағдайға төтеп беру — мүмкін емес.
Еске сала кетсек, бұдан бұрын «Қоянды: халық көп, қауіп көп — өрт сөндіру бекеті әлі жоқ» тақырыбында мақала жазған едік.
