Көкшетаудағы №10 мектептің жаңа ғимараты ашылмай жатып дауға ілікті. Жергілікті әлеуметтік желілерде жарияланған ақпаратқа сүйенсек, басқа мектептердің техникалық қызметкерлерін жаңа мектепті жинауға «ерікті түрде» жіберген көрінеді, деп хабарлайды Esilnews.kz тілшісі.
Ал ресми органдардың жауабы дайын: «бәрі өз еркімен келді, ешкімді мәжбүрлемедік».
Тек ел сенбейді. Себебі «еріктілік» деген сөз бізде көбіне «жоғарыдан түсетін нұсқауды» білдіретіні жасырын емес.
Мектеп директоры: «Барлығы өз бастамасымен келді»
№10 мектептің директоры Татьяна Гибнер жағдайды былай түсіндірді:
«Жаңа мектепті дайындау кезінде әріптестеріміз өз бастамасымен көмек көрсетті. Техникалық қызметкерлер, ата-аналар мен оқушылар жиһаз орнатуға, кабинеттерді тазалауға атсалысты. Бұл – ортақ іс, ешкім міндеттелген жоқ», – дейді директор.
Директордың сөзіне сенсек, бұл – азаматтық ынтымақ пен ұйымшылдықтың көрінісі.
Ал білім бөлімі: «Бәрі заңды, бәрі дұрыс»
Қалалық білім бөлімі де түсініктеме беріп үлгерді:
«Қатысушылардың барлығы өз еркімен келді. Мақсат – балаларға қауіпсіз әрі таза орта дайындау. Демалыс күндері шыққандарға қосымша демалыс беріледі», – делінген хабарламада.
Қағаз жүзінде бәрі керемет: ынта, еріктілік, алғыс, демалыс.
Бірақ елдің көкейіндегі сұрақ сол қалпы: «егер ерікті болса, неге бәрі бірдей шыққан?»
«Еріктілік» пен «міндет» арасындағы айырмашылық
Бізде бір ұғым бар – «өз еркімен мәжбүрлеу». Яғни, қағазда бәрі әдемі, іс жүзінде бәрі түсінікті. Кейде бастықтың бір-ақ ауыз «қолдау көрсетіңдер» деген сөзі жеткілікті.
Бұл жолы да солай болған сияқты. Жаңа ғимаратты дайындау ісіне шынымен ниетті адамдар да бар шығар, бірақ жүйе ішінде «жоқ» деу – ерлікпен тең екенін бәрі біледі.
Түйін
Жаңа мектеп – қуанышты жаңалық. Бірақ қуаныш адам еңбегін бағаламайтын, мәжбүрлі «еріктілікпен» көлеңкеленбеуі керек.
Шенеуніктер «бәрі өз еркімен болды» дейді. Ал қоғам «бәрі баяғыдай» дейді. Кімнің сөзіне сенеміз – уақыт көрсетер.
Бір анығы – еріктілік бұйрықпен болмайды. Ал бізде әлі күнге дейін «еріктілердің» артында бұйрық тұрады.
Еске сала кетсек, бұдан бұрын «Құрылыстың «қуанышы» — қуысталған қабырға: Атбасардағы үйлер тағы да шу тудырды» тақырыбында мақала жариялаған едік.
