Ақмола облысының Көкшетау қаласында 150 орынға арналған мүгедектерді оңалту орталығының құрылысы денсаулық сақтау саласындағы мемлекеттік әлеуметтік инфрақұрылымды дамыту бағдарламасы аясында қайта басталды. Жоба өңірдегі оңалту қызметтерін кеңейтуге және мүгедектігі бар азаматтарға кешенді медициналық-әлеуметтік көмек көрсету сапасын арттыруға бағытталған.
Нысан құрылысы бұған дейін жобалық-сметалық құжаттамадағы кемшіліктер мен алдыңғы мердігер ұйымның келісімшарттық міндеттемелерді орындамауына байланысты уақытша тоқтатылған болатын. Қазіргі таңда жоба бойынша жаңа мердігер ұйым тартылып, құрылыс-монтаж жұмыстары қайта жандандырылды. Барлық жұмыстар жаңартылған өндірістік кестеге сәйкес кезең-кезеңімен жүргізілуде.
Ақмола облысы құрылыс, сәулет және қала құрылысы басқармасының басшысы Азамат Байқуанышевтің айтуынша, жобаны іске асыру кезінде құрылыс құжаттамасы мердігерге кезең-кезеңімен берілуде. Бұл тәсіл нысанды түзету барысында жұмысты тоқтатпай, мерзімдік тәуекелдерді азайтуға мүмкіндік береді.
«Жобалық шешімдер кезең-кезеңімен нақтыланып отыр. Бұл құрылыс процесін үздіксіз жүргізіп, нысанды белгіленген мерзімде аяқтауға жағдай жасайды», – деді басқарма басшысы.
Құрылыс барысында технологиялық тәсіл де өзгертілген. Жоба монолитті құрылыс әдісіне көшірілді, бұл зауыттық дайын панельдерге тәуелділікті азайтып, құрылыс қарқынын арттыруға мүмкіндік беріп отыр. Сонымен қатар нысан заманауи медициналық талаптарға сәйкес қайта жаңартылуда.
Жалпы ауданы 22 мың шаршы метрден асатын орталық көпфункционалды медициналық-оңалту кешені ретінде жобаланған. Мұнда емдік дене шынықтыру залдары, массаж және диагностикалық кабинеттер, механотерапияға арналған арнайы аймақтар қарастырылған. Сондай-ақ УДЗ және рентген кабинеттері орнатылады.
Әлеуметтік бейімдеу бағытында тігін, қыш, ағаш өңдеу және музыкалық шеберханалар жұмыс істейді. Бұл бөлімдер пациенттердің қоғамға бейімделуіне және еңбек дағдыларын қалыптастыруына бағытталған.
Стационарлық бөлім 50 орынға есептеліп, мүмкіндігі шектеулі азаматтардың ұзақ мерзімді ем алуына бейімделеді. Орталық аумағында бақ-саябақ аймағы, спорт және демалыс алаңдары, сондай-ақ агротерапияға арналған жылыжай қарастырылған.
Жалпы, Ақмола облысында биыл әлеуметтік сала бойынша 26 нысан мемлекеттік бюджет және тиісті салалық бағдарламалар шеңберінде жүзеге асырылуда. Жаңа оңалту орталығы іске қосылғаннан кейін өңір тұрғындарына кешенді медициналық-оңалту қызметтері қолжетімді болып, заманауи стандарттарға сай емдеу және бейімдеу мүмкіндігі кеңеймек.
