Қазақ даласында бірлік пен татулық әрқашан ең қымбат қазына саналған. «Алтау ала болса – ауыздағы кетеді, төртеу түгел болса – төбедегі келеді» деген тәмсіл – бүгінгі күнге де дәл айтылған сөз. Сол бірліктің бүгінгі замандағы ең берік тірегі – Ата Заң.
Қазақстан Республикасының Конституциясы – жай ғана құқықтық құжат емес. Ол – тағдыр тоғыстырған түрлі этностың ортақ үйіндегі келісімнің кепілі, ел ішіндегі тыныштықтың темірқазығы. Әрбір азаматтың құқығын тең көріп, ұлтына, тіліне, дініне қарамай қорғау – осы құндылықтың өзегі.
Ақмола облысында осы қағидаттардың нақты көрінісін күнделікті өмірден байқауға болады. Түрлі этнос өкілдері бір шаңырақ астында тату-тәтті өмір сүріп, ортақ мақсатқа жұмыла еңбек етіп келеді. Бұл – құр сөз емес, бұл – заңмен бекітілген шынайы өмір шындығы.
Осындай қоғамдық келісімді нығайту жолында «Қоғамдық келісім» КММ жанындағы Журналистер клубының орны бөлек. Ақпарат айдынында қалам тербеген әрбір журналист – тек хабар таратушы ғана емес, ол – қоғамның үнін жеткізуші, бірлік пен татулықтың жаршысы. Клуб мүшелері дайындайтын әрбір материал, әрбір сюжет – қоғамға ой салып, елді ортақ құндылықтар төңірегіне топтастыратын рухани көпір іспетті.
Бүгінгі цифрлық дәуірде сөздің салмағы бұрынғыдан да артты. Бір ауыз сөз қоғамды біріктіруі де, ірітуі де мүмкін. Сондықтан журналистикадағы жауапкершілік – тек кәсіби міндет емес, ол – азаматтық ұстаным. Ақпараттың анықтығы мен әділдігі – қоғам тұрақтылығының көрінбейтін, бірақ мықты тірегі.
Ата Заң – уақытпен бірге жаңарып, қоғаммен бірге түлейтін тірі құжат. Оның әрбір бабы – елдің ертеңіне бағытталған бағдар. Сол себепті Конституцияны құрметтеу – заңды ғана емес, елді, жерді, ортақ тағдырды құрметтеу деген сөз.
Бірлік – сырттан келмейді, ол әр жүректен басталады. Ал сол жүректерді бір арнаға тоғыстырып тұрған – Ата Заң.
Аслан Әбутәліпов,
«Қоғамдық келісім» КММ жанындағы
Журналистер клубы төрағасының орынбасары.
