Құрметті Esilnews сайтының редакциясы!
«Арқа ажары» газетінің соңғы санынан сурет көріп, көңілге қаяу түсті. Онда «Жасай бер, жайнай бер, Көкшетау!» тақырыбымен шыққан мақалада елдігіміздің белгісі саналатын тұғыр бейнеленген екен. Бірақ, ең сорақысы – тұғырда Ту жоқ.
Қазақ үшін көк Ту – жай ғана мата емес. Ол – Тәуелсіздіктің тұмары, тарихтың айғағы, тағдырдың көрінісі. Желбіреген әрбір байрақ – ата-бабамыздың ғасырлар бойғы арманын, азаттығы үшін төгілген қанын, бүгінгі ұрпақтың мақтанышын білдіреді. Сондықтан Ту әрқашан биікте тұруы тиіс. Ал бос тұрған тұғыр – бұл салғырттық қана емес, рухани құлдыраудың нышаны.
Мемлекеттік Ту – мемлекеттік мекемелерде, мектептерде, алаңдарда үнемі қастерленіп, биікке көтеріліп тұруға тиіс. Ол тек мереке күндері ғана емес, күнделікті тіршілігіміздің айнымас бөлігі болуы шарт. Ал енді бір газеттің бетінде тұғырды бейнелеп, Туды ұмыт қалдыру – қарапайым қателік емес, рәмізге деген құрметтің кемшілігі.
Редакция ұжымының, журналист пен фототілшінің бір сәт ойланып, «бұл сурет нені білдіреді?» деген сауалды өзіне қоймағаны қынжылтады. Өйткені басылым – халықтың айнасы. Ал айна бұл жолы күңгірт тартты. Қазіргі жағдайда редакция басшылығының да мұндай жайтқа мән бермегені ойландырады. Ата сақалы аузына түскен тәжірибелі азаматтар басшылықта отырғанда, мемлекеттік рәмізге қатысты мұндай салғырттыққа жол берілмеуі керек еді.
Еске сала кетейік, «Арқа ажары» газетінде мемлекеттік Туға деген құрметсіздік бұған дейін де орын алған. Мәселен, өткен 2024 жылы Мемлекеттік рәміздер күніне арналған арнайы санында басылым бірінші бетке мыжылған Тудың суретін шығарып, оның үстіне тақырып жазған еді. Бұл – мемлекеттік Туды қорлаудың сорақысы болатын. Кеңес үкіметі кезінде мұндайға жол берілсе, басылымның редакторы ғана емес, тіпті обкомның бірінші хатшысы да қызметімен қош айтысар еді.
Біз үнемі рухани жаңғыру жайлы айтамыз. Бірақ ұлттық рәмізге салғырт қарау – қандай жаңғыру? Суретке көз салған жас ұрпақ «Ту болмаса да болады екен» деген қате түсінікке бой ұрмасына кім кепіл?
Көк байрақ – елдің ары, елдің намысы. Егер тұғыры тұрса, онда оның үстінде міндетті түрде Ту желбіреуі керек. Туы жоқ тұғыр – иесіз қалған елдіктің бейнесіндей әсер қалдырады. Бұл қарапайым сурет өңірде идеологияның жоқтығын тағы бір дәлелдеп беріп отыр. Өкінішті әрине…
Базарбай Рақымжанов, Көкшетау қаласының тұрғыны, оқырман.
