Биыл Ақмола облысында 500 шақырымға жуық автожол жөнделеді деп жоспарлануда. Аталған жұмыстарды жүзеге асыруға 60 миллиард теңгеден астам қаражат бөлінген. Қазіргі таңда өңірде, әсіресе шалғай аудандарда, жол инфрақұрылымын жақсарту бағытында ауқымды жұмыстар жүргізілуде.
Маңызды жобалардың бірі — Щучинск пен Степняк ауылын байланыстыратын автожолдың күрделі жөндеуі. «Щучинск–Степняк–Уәлиханово» бағыты бойынша жол ұзақ уақыт бойы қанағаттанарлықсыз күйде болған: асфальт жамылғысы қатты бүлініп, көптеген шұңқырлар пайда болған. Бұл жол Бурабай ауданы мен Біржан сал ауданы арасындағы маңызды көлік артериясы болып саналады.
Ұзындығы 42 шақырымды құрайтын жол учаскесін жаңарту жұмыстары 2022 жылы басталды. Сол жылы жобаға 9 миллиард теңгеден астам қаржы бағытталған болатын. Қазіргі таңда 35 шақырым жолда жөндеу жұмыстары аяқталды: жолдың негізі нығайтылып, қиыршық тас пен асфальт-бетон төселді. Мердігер ұйымдардың хабарлауынша, биыл Щучинсктегі айналма жолға дейін тағы 6,5 шақырым асфальт төселіп, 20 шақырым жолдың үстіңгі қабаты жаңартылады.
Бұдан бөлек, инженерлік инфрақұрылым жаңғыртылуда — жоспарланған 32 су өткізу құрылғысының 27-сі салынды, көпір, автопавильондар, жол белгілері, жарықтандыру жүйесі орнатылып, жол таңбалары сызылатын болады.
«Көкшетау Жолдары» ЖШС-нің учаске бастығы Михаил Штириннің айтуынша, жұмыстар қарқынды жүргізіліп жатыр және келесі жылы толық аяқталады.
Сонымен қатар, өңірде басқа да ірі жол-құрылыс жобалары іске асуда. Атап айтқанда, «Атбасар – Сочинское» трассасы бойындағы Қашқарқа өзені арқылы өтетін көпірдің құрылысы аяқталуға жақын. Орташа жөндеу аясында 25–30 шақырым жол жаңартылады, бұл жобаға шамамен 2 миллиард теңге бөлінген.
Биыл Ақмола облысында жалпы 109 жол жобасы жүзеге асырылуда. Барлық жұмыстар «Жол активтері сапасының ұлттық орталығы» РМК-ның өңірлік филиалының бақылауында.
Филиал директоры Талғат Қайратханның айтуынша, орталық мамандары нысандарға тұрақты түрде барып, құрылыс материалдарынан сынамалар алып, оларды зертханалық тексеруден өткізіп, стандарттарға сәйкестігін тексереді. Бұл тексерістердің басты мақсаты — мердігерлерді жазалау емес, жөндеу сапасын бақылау және кемшіліктерді дер кезінде анықтап, жою.
Жалпы, жол-құрылыс маусымы басталғалы бері облыстық маңызы бар 24 жол учаскесінде 15 рет тексеру жүргізіліп, 37 сынама алынған.
