Бір ай бұрын біз «Жақсы» дүкені маңындағы маскүнемдер мәселесін көтергенбіз. Әсері қысқа болды: бірнеше күн тыныштық орнады да, қазір жағдай қайтадан ушығып отыр. Дүкен алдында алақан жайған маскүнемдер тұрғындардың жолын бөгеп, ақша сұрап мазалайды.
Президент жариялаған «Заң және тәртіп» қағидаты Көкшетауда толық орындалып отыр деу қиын. Себебі тәртіп сақшыларына заң қолындағы құралдарды қолдануға ештеңе кедергі келтірмейді. Қазақстан Республикасының Әкімшілік құқық бұзушылық туралы кодексіне сәйкес:
Қоғамдық орында мас күйінде жүру – ескерту немесе айыппұл салуға негіз;
Ұсақ бұзақылық (қоғамдық тыныштықты бұзу, азаматтарды мазалау) – әкімшілік қамауға алу шарасын көздейді (3-тен 15 тәулікке дейін).
Яғни құқықтық база бар. Бірақ мәселе – қолданылмай отырғанында. Егер полиция шара қолданбай, маскүнемдер қайта-қайта бір жерде жиналатын болса, бұл азаматтардың құқықтары мен қауіпсіздігіне нұқсан келтіреді. Тұрғындардың балаларын дүкенге немесе мектепке жіберуге қорқуы – осының айқын дәлелі.
Бұл – тек «ұсақ бұзақылық» емес, қоғамдық тәртіпті жүйелі түрде бұзу. Ал оған заң аясында жедел әрекет ету – полицияның тікелей міндеті.
Президент сөзі үш күнге ғана емес, күн сайын орындалуы тиіс. Әйтпесе, жарияланған қағидаттың барлығы құрғақ ұран күйінде қала береді.
Оқырман, Сіз қалай ойлайсыз, бұл мәселе неге шешілмей отыр?
Мақаланың астына пікір қалдырып, достарыңызбен бөлісіңіз.
