Биылғы жыл Қазақстанда Жұмысшы мамандықтар жылы деп жарияланғаны белгілі. Осы орайда еліміздің әр өңіріндегі кәсіби-техникалық білім беру ұйымдары еңбек нарығына қажетті кадрларды даярлауда ерекше рөл атқарып келеді. Бүгінде Көкшетаудағы Жоғары техникалық колледже техникалық және кәсіби бағыттағы жоғары білікті мамандарға сұранысқа сай білім беріледі, деп хабарлайды Ақмола облысының ішкі саясат басқармасынан.
Колледж мемлекеттік стандарттарға сәйкес оқу үдерісін ұйымдастырып қана қоймай, студенттердің кәсіби дағдыларын дамытуға басымдық береді. Мұнда заманауи жабдықталған оқу зертханалары мен құзыреттілік орталықтары жұмыс істейді. Теориялық білімді тәжірибемен ұштастыру мақсатында дуалды оқыту жүйесі енгізілген.
«Біздің басты мақсатымыз еңбек нарығына шынымен де қажет мамандарды дайындау. Қазір жұмысшы мамандықтарға деген сұраныс артып келеді. Студенттердің болашақта жұмысқа орналасуына жағдай жасау үшін біз оларды теориялық тұрғыдан ғана емес, нақты өндірістік ортада да шыңдаймыз», –дейді колледж басшылығы.
Жоғары техникалық колледж бүгінде Ақмола облысының 70-тен астам кәсіпорнымен тығыз әріптестік орнатқан. Бұл ынтымақтастық студенттердің өндірістік тәжірибеден өтуіне, ал оқу бітірген соң тұрақты жұмыс табуына үлкен мүмкіндік береді.
«Әлеуметтік серіктестеріміздің қатарында өңірдегі ірі зауыттар мен кәсіпорындар бар. Олар студенттерге нақты жобалармен жұмыс істеуге мүмкіндік береді. Ал бұл тәжірибе түлектердің еңбек нарығында бәсекеге қабілетті болуына жол ашады», – дейді колледждің өндірістік оқыту жөніндегі әдіскері.
Колледждің ірі әлеуметтік серіктестерінің қатарына құрылыс, энергетика, машина жасау және ақпараттық технология саласындағы кәсіпорындар кіреді. Мұндай байланыс оқу ордасының мәртебесін арттырып қана қоймай, жастардың мамандыққа деген қызығушылығын күшейтіп келеді. Мәселен, «Қазақстан Аграрлық Инновациялық Корпорациясы» ЖШС жыл сайын 80 пайыз колледж түлектерін жұмысқа қабылдап келеді.
«Біз Көкшетау қаласындағы оқу орындарымен көп жылдан бері әріптестік байланыс орнатып келеміз. Қазір жұмысшы мамандықтарына сұраныс бұрынғыдан да жоғары. Біздің кәсіпорында көп мөлшерде техника өндіріледі, сондықтан білікті мамандар қажет. Осы тұрғыда Жоғары техникалық колледжбен әріптестігіміз үлкен көмек көрсетіп отыр. Біз өз тарапымыздан студенттерге тәжірибеден өтуге жағдай жасап, жұмыс орындарын ұсынамыз, мамандарды үйретіп, олардың біліктілігін арттыруға мүмкіндік береміз. Практикаға келген студенттердің 80 пайызы кейін тұрақты жұмысқа қалады. Қазір біздің кәсіпорында 360 адам еңбек етеді, соның ішінде жуырда оқу орнын бітіріп келген 30-ға жуық жас маман бар. Олар әмбебап станокшылар, дәнекерлеушілер сияқты мамандықтарда жұмыс істеп жүр», — дейді «Қазақстан Аграрлық Инновациялық Корпорациясы» ЖШС өндіріс бөлімінің басшысы Қайрат Дюсенбеков.
Сондай-ақ , Колледж студенттері үшін шәкіртақы, әлеуметтік жеңілдіктер жағы да қарастырылған. Оқу орнының басты жетістіктерінің бірі – студенттердің WorldSkills чемпионатындағы табыстары. Әр жыл сайын болашақ жұмысшы мамандар түрлі салалар бойынша жүлделі орындарға ие болып жүр. Бұл – колледждің білім сапасы мен оқыту жүйесінің тиімділігін дәлелдейді.
