Ақмола облысында Ақылбай орманшылығының қызметкері Азамат Төлебаевқа қатысты іс ақыры әділ шешімін тапты. Апелляциялық сот орманшыны толықтай ақтап, оның кінәсіз екенін мойындады, деп хабарлайды Esilnews.kz тілшісі.
Бір күнде жәбірленушіден айыпталушыға айналды
Биыл сәуір айында Ақылбай орманшылығы аумағында орман шебері Азамат Төлебаевқа белгісіз екі адам шабуыл жасаған еді. Кейін олардың бұрынғы әріптестері екені анықталды.
Сол күні Азамат қызмет бабымен жүрген. Алайда оған бұрынғы әріптестері кездескен, оның оңы жанжалға ұласып, орманшы соққыға жығылған. Ол басынан жарақат алып, саусағы сынған, денесінің бірнеше жері көгерген.
Дегенмен бұл істің одан арғы барысы көпшілікті таңғалдырды: жәбірленуші орманшы өз кезегінде айыпталушыға айналды. Тергеу барысында полиция оның «ішімдік ішкенін» алға тартып, күдіктілердің сөзіне сүйенді. Бірінші сатыдағы сот та дәл осы тұжырымды негізге алып, Төлебаевқа айыппұл мен қоғамдық жұмыс жазасын тағайындаған болатын.
Әділдікке сенген адам жеңді
Орманшы мұндай шешіммен келіспей, апелляциялық шағым түсірді.
Апелляциялық сот материалдарды жан-жақты қарап, алғашқы үкімнің үстірт болғанын анықтап, Азамат Төлебаевты толық ақтау жөнінде шешім шығарды.
Сонымен қатар, сот шабуыл жасағандардың бірі бойынша істі қайта қарауға жолдады.
«Шындық бәрібір жеңеді»
Азамат Төлебаевтың айтуынша, оның ең басты мақсаты – өз есімін тазарту және шындықты дәлелдеу болған.
«Мен ешкімге зиян тигізген жоқпын, тек өз жұмысымды істеп жүргенмін. Әділдікке сендім, ақыры сол сенім ақталды», – дейді ол.
Түйін
Бұл оқиға – қарапайым еңбек адамының табандылығы мен шындық жолындағы күресінің көрінісі.
Әділдік жолы кейде ұзақ болуы мүмкін, бірақ шындық бәрібір өз орнын табады.
