Қытайда бағасы 4900 АҚШ доллары тұратын робот сатылымға шығарылды. Жасанды интеллект арқылы жұмыс істейтін робот үйді жинастырып, тамақ істейді, әртүрлі сауалдарға жауап беріп, әңгіме-дүкен құра алады, оған қоса оққағар қызметін атқаруға да қабылеті бар. Шығыс төбелесінің біраз тәсілдерін меңгерген робот көшеде кездескен текебай тентектерді сабасына түсіруге қауқарлы.
Илон Масктің компаниясы жасаған осындай роботтың бағасы 200 мың доллар тұратын. Оны сатып алуға екінің бірінің шамасы жетпейтіні түсінікті. Ал қытайлықтар бағасы қолжетімді роботты өндірісе көптеп шығаруды қолға алды. Сатылымға шығарылған алғашқы күні ғана роботтың 200 мыңдай данасы өтіп кетті. Бұның өзі оған деген сұраныстың жоғары болатынын айғақтағандай.
Қазір жасанды интеллекттің көмегімен жүргізілетін автокөліктер, робот даяшылар, құрылысшылар, басқа да салаларда жұмыс істейтін роботтар ешкімді қайран қалдырмайды. Жасанды интеллект программасы орнатылған шөп шабатын машинаны қазіргі күні Батыс елдері өте көп қолданады. Үй айналасына өскен арамшөпті адамның қатысуынсыз өзі шауып тазартатын шөпшапқыштың бағасы онша қымбат емес. Жасанды интеллектке негізделген тамақ дайындайтын құрылғылар да көбеюде. Соны пайдаланып, еш жандарын қинамай көңілдері қалаған тамақтарын жасатып алып ішетін адамдар көп.
Жасанды интеллект көп салаларда ауыр да күрделі жұмыстарды мойындарына алып, адамдардың қолын босатуда. Алдағы уақытта робот араласатын салалар көбейе түсері анық. Дегенмен де, таяқтың екі ұшы болатындығы сияқты, бұның залалды жағы да бар. Қазірдің өзінде жасанды интеллект бірқатар салаларда адамадарды ығыстырып шығарып жатыр. Дамыған елдерде қазір такси жүргізушісінің қажеті болмай қалды. Жасанды интеллект арқылы басқарылатын таксилердің қызметі жолаушыларды толық қанағаттандырады. Жасанды интеллектінің қызмет ауқымының өсуі көп адамдарды жұмыссыз қалдырып, күнкөрістерін қиындатуда. Алдағы уақытта бұндай жағдай көбеймесе, азаймайтыны анық.
Тағы да жоғарыда айтылған қытайлықтар сатуға шығырға роботқа оралайық. Теңгеге шаққанда бағасы 3 млн тұратын роботты алуға ынталылар егер сатылымда болса қазақстандықтардың арасында да аз болмас еді. Үйді жинап, тамақ пісіретін, одан қалды көшеде бұзақылардан қорғайтын роботты жұрттар таласа-тармаса сатып алатынында дау жоқ. Осы жайға қарап, таяудағы он-жиырма жылда әлемде жасанды интеллект арқылы жұмыс жасайтын роботтардың барлық салада көптеп шығарылып, халықтың кең тұтынатын құралына айналатынын аңғаруға болады. Уақыт өткен сайын олардың қызметі күрделеніп, сапасы да арта түсуде. Адам жасай алмайтын шаруаларды робот қиналмай жасайды. Тек қуат болса болғаны.
Бұрын фантастикалық шығармаларлың сюжеті болған ақылды роботтар өмір шындығына айналып келеді. Бұның өзі біз тірлік кешіп жатқан қоғамды түбегейлі өзгертері анық. Сарапшылар таяу болашақта қажетсіз болып қалатын мамандықтар туралы айтып, жазуда. Осыған орай, ертең керексіз болып, далада қалмас үшін заман ағымына бейімделіп, жаңа мамандықтар игерудің қажеттігін көрсетеді.
Қалкөз Жүсіп.
