Қазір иісі мұсылман қауымы үшін қасиетті саналатын Рамазан айы өтіп жатыр. Бұл айда мұсылмандар бес парыздың бірі саналатын – ораза ұстайды. Қазақстан зайырлы мемлекет, яғни дін мен мемлекет бөлек. Дегенмен де, соған қарамастан еліміздің әр өңірінде жергілікті әкімдер арасында ораза ұстағандарға арнап ауызашар беру шаралары бой көрсетуде. Әкім де пенде, бұны дабыра қылмай өз қалтасынан ақшасын шығарып, ауызашар беріп жатса, оған еш әңгіме жоқ. Бірақ та, ақпарат құралдары арқылы жалпақ жұртқа жариялап, пәленше әкім жүздеген адамға ауызашар берді деп айтқызып, жазғызып, оны әлемуметтік желілерге салу зайырлы мемлекетте өмір сүретін билік өкілінің атына абырой әпермейтін іс.
Таяуда дүниеден өткен қазақтың классик жазушысы Мұхтар Мағауин қазақ ислам дініне жүзін бұрып, мешіттер көбейіп келеді деп қуанып едік, сөйтсек, оның пайдасынан гөрі, залалы көп болып шықты дегенді айтып еді бірнеше жыл бұрын. Кеңес заманында атеистік түсінікті санасына сіңірген аға ұрпақ өкілдері үшін дін ислам имандылықтың қайнар көзі, адамдарды бейбітшілік пен ізгілікке тәрбиелейтін идеологиялық қуатты құрал болып саналады. Бірақ та, қазіргі елімізге енген ислам діні адами тәрбиеден гөрі, пендешілік теріс түсінікті жастарымыздың санасына сіңіріп, улайтын құрал болып отырған жайы бар. Осындай фанатизмге негізделген исламды ресми дінге айналдырған Иран, Ауғанстан сияқты елдердің жағдайы оның қаншалықты қауіпті екендігін көрсетеді. Ислам дінінің салдарынан бұл елдер экономикалық жағынан мешеулеп артта қалды, халықтың тұрмыс деңгейі өте төмен.
Осы орайда, елімізде исламның теріс ағымдарын насихаттайтын адамдардың көбейіп кетуі алаңдатады. Күні кеше әлеуметтік желіде бір имам «жәннатты ақшамен сатып алуға болады» дегенді айтты. Оның пайымынша, 700 мың теңгеге жұмаққа кіргізетін жолдаманы сатып алуға болады екен. Интернетте қаптап кеткен уағыз айтқыш имам-молдалардың уағыздарының мән-мазмұны жыныс жақындығы мен жұмақ рахатының аумағынан аспайды. Тіпті, бір имам уағызында еркектің мүшесін үлкейтетін препаратты жарнамалап, айды аспанға шығарды.
Қазір елімізде 3 мыңнан астам мешіт, 3 млн-дай намазхан бар деп кейбірулер бөріктерін аспанға атып қуанып жүр. Мешіттер мен намаз оқитын адамдар санының көбейгені жақсы-ау, дегенмен, солардың бойында адами имани қасиеттер орнығып, ежелгі исламның жақсы игіліктерін насиахттап жатса құба-құп дер едік. Өкініштісі сол, жаман әдеттер мен теріс әрекеттердің көбі сол намазхандар мен дін қызметкерлерінен шығып жататыны шындық.
Оразаны қазір мектеп оқушылары көп ұстайтын болып жүр. Сабақты тастап, мешітке жұма намазына баратын балалар да аз емес. Осылардың бәрі зайырлы мемлекеттің заңдары мен шарттарын бұзу емес пе. Медицина мен психология саласының мамандары жас балалардың ауыз бекітулері ағзаларына залалды екендігін айтуда. Имам-молдалардың уағыздарын тыңдап алып, ата-аналарына бағынбай, намаз оқымайтын оларды кәпір атайтын жастар шығуда. Осы жағдайлардан түйеріміз: ислам дінін ұстану жастарымыздың бойында имани жақсы қасиеттерді орнықтырып жатқан жоқ. Керісінше, фанатизм атты ешкімді тыңдамайтын, өзімдікі ғана дұрыс дейтін өзімшіл көзқарасты саналарына сіңіруде. Зайырлы мемлекттік бағдар ұстанып отырған елдегі мемлекеттік басшы қызмет атақаратын адамдардың осындай жағдайда ауызашар беріп, ол әрекеттерін жарияға жар салып жарнамалауы қаншалықты дұрыс? Бұның өзі зайырлы қоғамның шарттарына қайшы әрекет емес пе.
Қалкөз Жүсіп.
