Қыс ортасында Көкшетау қаласының бірқатар аудандарында тұрғындар пәтер ішіндегі температураның 15–18 градустан аспайтынын айтып, алаңдаушылық білдіруде. Батареялар толық жылымай, адамдар бірнеше көрпемен ұйықтауға, балаларды үй ішінде жылы киіндіруге мәжбүр.
Жылу мәселесі Сарыарқа шағынауданы (21а, 8/2, 26), Уәлиханов, 206, Ақан сері, 121, Қуанышев, 143а, Осипенко, 1/1, Ескі әуежай, 13/3, Гагарин, 11а, Сабатаев, 196, Элеватор ауданы, Автоқалашық, Васильковка, Шанхай, сондай-ақ Көктем мен Сарыарқа аудандарында тіркеліп отыр.
Тұрғындардың айтуынша, алдыңғы жылдары мұндай жағдай болмаған, бұл мәселенің ауа райынан гөрі жылыту жүйесін басқару мен бақылауға байланысты екенін көрсетеді. Әсіресе, жас балалар бар отбасылар үшін суық пәтер денсаулыққа қауіп.
Осыған байланысты «Көкшетау Жылу» коммуналдық кәсіпорнының басшылығы ресми түсініктеме берді. Кәсіпорын қызметкерлерінің мәліметінше, диспетчерлік қызмет тәулік бойы жұмыс істейді, ал үй ішіндегі жылудың бөлінуі мен жылыту жүйелерінің жағдайына ПИК жауапты. «Көкшетау Жылу» жылу энергиясын үйдің шекарасына дейін қажетті көлемде жеткізетінін хабарлады.
Ақау анықталған жағдайда тұрғындарға нақты мекенжайды көрсетіп, диспетчерлік қызметке хабарласу ұсынылады (25-51-99, 40-11-92).
Жылу – тек есепте емес, пәтер ішіндегі нақты температурамен өлшенуі тиіс.
