Бурабай ауданында бесқабатты тұрғын үйге қосылған бір қабатты дәмханада газ-ауа қоспасы жарылды. Оқиға салдарынан 6 адам қаза тауып, 20 адам әртүрлі дәрежеде жарақат алды.
Ақмола облысының ТЖД хабарлауынша, оқиға орнына 5 минут ішінде барлық қажетті күштер мен құралдар жеткізілді. Құтқарушылар өрттен 8 газ баллонын шығарды және 10-нан астам адамды аман алып шықты. Өрт толық сөндірілді, қазіргі уақытта құтқарушылар қирандыларды тазартып, зардап шеккендерді анықтау жұмыстарын жүргізуде.
Оқиға орнына ТЖД басшылығы, облыс әкімінің орынбасары, барлық құтқару қызметтері – өрт сөндіру, құтқару, медициналық, полиция және газ-техникалық инспекциялар келіп жетті.
Санавиация мен реанемобильдер дайындықта тұр.
Қазіргі таңда оқиғаның себептері мен барлық жағдайлары анықталуда. Ақмола облысының ТЖД жедел желі ашты: 8 (7162) 514-298.
